کیا تکبیر تحریمہ کے بعد ہاتھ باندھنا ضروری ہے جبکہ امام رکوع میں ہو؟

 (240)

کیا تکبیر تحریمہ کے بعد ہاتھ باندھنا ضروری ہے جبکہ امام رکوع میں ہو؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

السلام علیکم ورحمة اللہ وبرکاتہ

کیا فرماتے ہیں علمائے دین و مفتیان شرع متین مسںٔلہ ذیل کے بارے میں

اگر کسی نے امام کو رکوع میں پایا تو وہ تکبیر تحریمہ کے بعد ہاتھ باندھے گا یا نہیں؟

رہنمائی فرمائیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساںٔلہ:_نکہت فاطمہ ناگپور انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمدہ ونصلی علی رسوله الکریم

وعلیکم السلام ورحمة الله وبرکاتہ 

الجواب بعونه تعالیٰ عزوجل

مذکورہ صورت میں امام رکوع میں ہو تو آنے والا شخص اس طرح کھڑے کھڑے تکبیرِ تحریمہ کہے کہ ہاتھ گھٹنوں تک نہ پہنچیں پھر اگر وہ جانتا ہو کہ امام صاحب رکوع میں اتنا وقت لگاتے ہیں کہ وہ ثنا یعنی سبحانک اللھم آخر تک پڑھ کر امام کے ساتھ رکوع میں شامل ہو سکتا ہے، تو تکبیرِ تحریمہ کے بعد ہاتھ باندھ کر ثنا پڑھے ، کیونکہ ثنا پڑھنا سنت ہے ، اس کے بعد دوسری تکبیر کہتا ہوا رکوع میں جائے اور اگر یہ گمان ہو کہ ثنا پڑھنے کی صورت میں امام صاحب رکوع سے اٹھ جائیں گے تو تکبیرِ تحریمہ کے بعد ہاتھ نہ باندھے ،بلکہ فوراً دوسری تکبیر کہتا ہوا رکوع میں چلا جائے 

الفتاوی الھندیۃ میں ہے

کل قیام فیہ ذکر مسنون فالسنة فیہ الاعتماد و کل قیام لیس فیہ ذکر مسنون فالسنة فیہ الاسال کذا فی النھایۃ ، ملخصا

ترجمہ ہر وہ قیام جس میں مسنون ذکر ہو ، اس میں ہاتھ باندھنا سنت ہے اور ہر وہ قیام جس میں  مسنون ذکر نہیں، اس میں سنت ہاتھ لٹکانا ہے ، اسی طرح نہایہ میں ہے (الفتاوی الھندیۃ ، ج1 ، ص81، مطبوعہ کراچی)

سیدی اعلیٰ حضرت الشاہ امام احمد رضا خان رحمۃ اللہ علیہ سے اسی طرح کا ایک سوال کیے کہ جماعت رکوع میں ہو تو مسبوق نمازی کونیت کرکے اور تکبیر کہہ کر ہاتھ باندھنا چاہئے یا بے باندھے دوسری تکبیر کہہ کر رکوع میں جانا چاہئے یا ایك ہی تکبیر اس کے واسطے کافی ہے یاکیا حکم ہے؟ 

سرکار اعلیٰ حضرت علیہ الرحمہ جواب ارشاد فرماتے ہیں

ہاتھ باندھنے کی تواصلًا حاجت نہیں اور فقط تکبیر تحریمہ کہہ کر رکوع میں مل جائے گا تو نماز ہو جائے گی مگر سنت یعنی تکبیر رکوع فوت ہوئی لہٰذا یہ چاہئے کہ سیدھا کھڑا ہونے کی حالت میں تکبیر تحریمہ کہے اور سبحٰنك اللھم پڑھنے کی فرصت نہ ہو یعنی احتمال ہو کہ امام جب تك سراٹھالے گا تومعًا دوسری تکبیر کہہ کر رکوع میں چلاجائے اور امام کا حال معلوم ہوکہ رکوع میں دیر کرتاہے سبحٰنك اللّٰھم پڑھ کر بھی شامل ہوجاؤں گا تو پڑھ کر رکوع کی تکبیر کہتاہوا شامل ہو یہ سنت ہے اور تکبیر تحریمہ کھڑے ہونے کی حالت میں کہنی توفرض ہے بعض ناواقف جو یہ کرتے ہیں کہ امام رکوع میں ہے تکبیرتحریمہ جھکتے ہوئے کہی اور شامل ہوگئے اگراتنا جھکنے سے پہلے کہ ہاتھ پھیلائیں توگھٹنے تك پہنچ جائیں ﷲ اکبر ختم نہ کرلیا تونماز نہ ہوگی، اس کاخیال لازم ہے(فتاویٰ رضویہ جلد ۷، ص ۲۳۵,۲۳۶) 

 والله و رسوله اعلم بالصواب

كتبته اسدیہ قادریہ بینی آباد مظفرپور بہار۔ گروپ خواتین کے مسائل کا شرعی حل