سامان، نقد میں سستی، اور ادھار میں مہنگی بیچنا کیسا ہے؟

 (300)

سامان، نقدمیں سستی، اور ادھار میں مہنگی بیچنا کیسا ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

الســـلام علیکم ورحمۃ اللہ وبرکاتہ

کیا فرماتے ہیں علمائے دین و مفتیان شرع و متین مسںٔلہ ذیل کے بارے میں

سامان نقد میں سستی اور ادھار میں مہنگی بیچنا کیسا ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساںٔل:_ محمد ذیشان رضاسکتی راجستھان انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمدہ ونصلی علی رسوله الکریم

وعلیکم السلام ورحمة الله وبرکاتہ 

الجواب بعونه تعالیٰ عزوجل

ہر شخص کو اختیار ہے کہ اپنی چیز کم یا زیادہ ریٹ میں فروخت کرے شریعت میں اس کی کوئی ممانعت نہیں،البتہ عموماً سامان نقد میں سستی اور ادھار میں مہنگی ہی بیچی جاتی ہے اگر کوئی اور شرعی خرابی نہ ہو تو ایسا کرنے میں کوئی حرج نہیں۔ مگر یہ ضروری ہے کہ سامان بیچتے وقت یہ بات طے کر دے کہ اس سامان کی قیمت نقد خریدو تو اتنی ہے اور ادھار خریدو تو اتنی ہے

فتاوی امجدیہ میں ہے:

ہر شخص کو اختیار ہے کہ اپنی چیز کم یا زیادہ، جس قیمت پر مناسب جانے بیع کرے، تھوڑا نفع لے زیادہ شرع سے اس کی ممانعت نہیں۔(فتاویٰ امجدیہ، ج سوم، ص ۱۸۱) 

فتاویٰ فیض رسول میں ہے:

کوئی بھی سامان اس طرح بیچنا کہ اگر نقد قیمت فوراً ادا کردے تو تین سو قیمت لے اور اگر ادھار سامان کوئی لے تو اس سے تین سو پچاس روپیہ اسی سامان کی قیمت لے۔ یہ شریعت میں جائز ہے سود نہیں ہے نقد اور ادھار کا الگ الگ بھاؤ رکھنا شریعت میں جائز ہے مگر یہ ضروری ہے کہ سامان بیچتے وقت ہی یہ طے کردے کہ اس سامان کی قیمت نقد خریدو تو اتنی ہے اور ادھار خریدو تو اتنی ہے۔(فتاویٰ فیض رسول، ج دوم، صفحہ ۳۳۳)

والله و رسوله اعلم بالصواب

كتبته اسدیہ قادریہ بینی آباد مظفرپور بہار۔ گروپ خواتین کے مسائل کا شرعی حل

تصحیح و تصدیق حضرت مفتی محمد مجیب قادری حنفی العربی دار الافتاء البرکاتی علماء فاؤنڈیشن شرعی و جواب