رخصتی سے پہلے کیا لڑکی شوہر سے نفقہ کا مطالبہ کر سکتی ہے؟

 (299)

رخصتی سے پہلے کیا لڑکی شوہر سے نفقہ کا مطالبہ کر سکتی ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

الســـلام علیکم ورحمۃ اللہ وبرکاتہ

کیا فرماتے ہیں علمائے دین و مفتیان شرع متین مسںٔلہ ذیل کے بارے میں

اگر کسی لڑکی کا صرف ابھی نکاح ہوا ہو اور رخصتی نہ ہوئی ہو، تو کیا لڑکی لڑکے سے نفقہ کا مطالبہ کر سکتی ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساںٔلہ:_صبا کولکتہ انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمدہ ونصلی علی رسوله الکریم

وعلیکم السلام ورحمة الله وبرکاتہ 

الجواب بعونه تعالیٰ عزوجل

اگر بالغہ عورت نکاح ہو جانے کے بعد رخصتی سے پہلے نفقہ کا مطالبہ کرے تو اس کی متعدد صورتیں ہیں، ذیل میں ہر صورت کے حکم کے ساتھ بیان کیا جاتا ہے ۔ 

بالغہ عورت سے نکاح ہوا اور اس نے نفقہ کا مطالبہ کر دیا جبکہ شوہر نے ابھی اسے اپنے گھر پر لے جانے کا نہیں کہا، تو نفقہ شوہر پر لازم ہے۔ شوہر نے اسے اپنے گھر پر لے جانے کا کہا لیکن عورت نے انکار نہیں کیا ، نفقہ شوہر پر لازم ہے۔عورت نے انکار کیا لیکن انکار ناحق نہیں مثلا کہتی ہے جب تک مہر معجل نہ دو گے، نہیں جاؤں گی، نفقہ شوہر پر لازم ہے۔ (مہر معجل وہ ہے جو خلوت سے پہلے دینا قرار پائے ) عورت نے انکار کیا اور انکار ناحق ہے مثلا مہر معجل تھا ہی نہیں یا تھا لیکن شوہر ادا کر چکا ہے یا عورت معاف کر چکی ہے، نفقہ شوہر پر لازم نہیں جب تک شوہر کے گھر نہ آجائے۔

بہار شریعت میں ہے

بالغہ عورت جب اپنے نفقہ کا مطالبہ کرے اور ابھی رخصت نہیں ہوئی ہے تو اُس کا مطالبہ درست ہے جبکہ شوہر نے اپنے مکان پر لے جانے کو اُس سے نہ کہا ہو۔ اور اگر شوہر نے کہا تُو میرے یہاں چل اور عورت نے انکار نہ کیا جب بھی نفقہ کی مستحق ہے اور اگر عورت نے انکار کیا تو اس کی دوصورتیں ہیں اگر کہتی ہے جب تک مہرِ معجل نہ دوگے نہیں  جاؤنگی جب بھی نفقہ پائے گی کہ اُس کا انکار نا حق نہیں اور اگر انکار نا حق ہے مثلاً مہرِ معجل ادا کر چکا ہے یا مہر معجل تھا ہی نہیں یا عورت معاف کرچکی ہے تو اب نفقہ کی مستحق نہیں جب تک شوہر کے مکان پر نہ آئے (بہار شریعت ح ۸, ص ۲۶۳)

والله و رسوله اعلم بالصواب