کیا حالت حیض میں بسم اللہ الرحمن الرحیم پڑھ سکتے ہیں یا نہیں؟

 (177)

کیا حالت حیض میں بسم اللہ الرحمن الرحیم پڑھ سکتے ہیں یا نہیں؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

السلام علیکم ورحمتہ اللہ وبرکاتہ 

کیا فرماتے ہیں علمائے دین و مفتیان شرع متین مسئلہ ذیل کے بارے میں کہ 

کیا حالت حیض میں بسم اللہ الرحمن الرحیم پڑھ سکتے ہیں؟ اور اگر پڑھ سکتے ہیں تو کیوں حالانکہ بسم اللہ الرحمن الرحیم قرآن کی آیت ہے اور حالت حیض میں قرآن کی آیت پڑھنا حرام ہے؟

شرعی رہنمائی فرمائیں جزاک اللہ خیرا کثیرا 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سائلہ شفاء فاطمہ قادریہ رضویہ کانپور انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمده ونصلي علي رسوله الكريم 

وعلیکم السلام ورحمة الله وبركاته 

الجواب بعونه تعالي عز وجل 

حالت حیض میں قرانی ایات بطور تلاوت نہیں پڑھ سکتے پر وہ آیات جو دعا پر مشتمل ہیں اسے پڑھ سکتے ہیں اسی طرح بسم اللہ الرحمن الرحیم کا وظیفہ بھی حالت حیض پڑھنا درست ہے۔

ففی الدر المختار: (ولا بأس) لحائض وجنب (بقراءة أدعية ومسها وحملها وذكر الله تعالى، وتسبيح) اھ (1/ 293)

وفی حاشية ابن عابدين: (قوله بقصده) فلو قرأت الفاتحة على وجه الدعاء أو شيئا من الآيات التي فيها معنى الدعاء ولم ترد القراءة لا بأس به اھ (1/ 293) 

حاصل کلام یہ ہے کہ اعوذ باللہ من الشیطن الرجیم قرآن مجید کی آیت کریمہ نہیں ہے اس لیے اس کو تو ہر صورت پڑھ سکتے ہیں اور بسم اللہ الرحمن الرحیم ایک آیت کا جز بھی ہے اور قرآن مجید کی ایک مستقل آیت بھی  ہے جو سورتوں میں امتیاز کرنے کے لیے نازل ہوئی ۔اسے قرآن پاک کی نیت سے  حالت حیض ونفاس میں نہیں پڑھ سکتے ۔ بلانیت قرآن، ذکر وثناکی نیت سے،برکت حاصل کرنے کےلئے یاکسی کام کوشروع کرنے کی نیت سےاسے حالت حیض ونفاس میں پڑھ سکتے ہیں۔

فتاوی رضویہ میں ہے

 اور بسم اﷲ کہ شروع پرلکھتے ہیں غالبا اس سے تبرک وافتتاح تحریر مراد ہوتا ہے۔ نہ کتابت آیات قرآنیہ، اور ایسی جگہ تغییر قصد سے تغییر حکم ہوجاتاہے ولہذا جنب کو آیات دعا وثنا نہ نیت قرآن بلکہ بہ نیت ذکر ودعا پڑھنا جائز ہے۔فی الدرالمختار لو قصد الدعاء والثناءاوافتتاح امر حل فی الاصح حتی لو قصد بالفاتحۃ الثناء فی الجنازۃ لم یکرہ الخ ملخصا۔ "(درمختار میں ہے اگر تسمیہ وغیرہا سے دعا، ثناءیا کسی کام کے شروع کرنے کا ارادہ کیا جائے تو زیادہ صحیح قول میں جنبی اس کو پڑھ سکتا ہے یہاں تک کہ فرمایا کہ نماز جنازہ میں فاتحہ سے ثناء کا ارادہ کیا جائے تو نماز جنازہ میں فاتحہ کا پڑھنا مکروہ نہیں الخ ملخصا۔)"

۔(فتاوی رضویہ ج23،ص337،338، رضا فاونڈیشن ،لاہور)

واللہ ورسولہ اعلم بالصواب 

كتبه/ محمد مجيب قادري لهان ١٨خادم دارالافتاء البركاتي علماء فاونديشن شرعي سوال و جواب ضلع سرها نيبال