(176)
گاڑی پر زکات واجب ہوگی یا نہیں؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
السلام علیکم ورحمۃ اللہ تعالی وبرکاتہ
اس مسئلے کے بارے میں علمائے دین کیا فرماتے ہیں زید کے پاس دو کار ہیں حالانکہ ایک کار سے اس کے گھر کا کام ہو سکتا ہے دوسری کار جو ہے وہ کبھی کبھی کام میں اتی ہے تو اس پر زکوۃ ہوگی یا نہیں ہوگی یا دونوں پر زکوۃ ہوگی؟ اور اگر کرائے پر چلتی ہیں دونوں تو کیا حکم ہے یا ان کے کرائے پر زکوۃ ہوگی مع حوالے کے ساتھ رہنمائی فرمائیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سائلہ انشاء نور رضویہ رامپور یوپی انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نحمده ونصلي علي رسوله الكريم
وعلیکم السلام ورحمة الله وبركاته
الجواب بعونه تعالي عز وجل
جو گاڑی استعمال کی نیت سے خریدی گئی ہو، اس پر زکات واجب نہیں ہوتی، لہذا صورت مسئولہ میں مذکورہ دونوں گاڑیوں کی زکات سائل پر واجب نہ ہوگی، البتہ مذکورہ گاڑیاں اگر سائل فروخت کرے گا، تو ان سے حاصل نقدی اگر محفوظ رہتی ہے، تو زکات کا سال مکمل ہونے پر زکات کا حساب کرتے ہوئے نقدی کو بھی اموا ل زکات میں شامل کرکے زکات ادا کرنا واجب ہوگی۔اسی طرح کرائے پر اگر گاڑی چلتی ہو تو رقم پر سال گزرنے پر زکات واجب ہوگی جبکہ مالک نصاب ہو۔
فتاوى هنديہ میں ہے
(وأما شروط وجوبها فمنها) ۔(ومنها فراغ المال) عن حاجته الأصلية فليس في دور السكنى وثياب البدن وأثاث المنازل ودواب الركوب وعبيد الخدمة وسلاح الاستعمال زكاة
۔( كتاب الزكاة، الباب الأول في تفسيرها وصفتها وشرائطها، ١ / ١٧٢، ط: دار الفكر)
الموسوعة الفقهية الكويتيةمیں ہے:
اتفق الفقهاء على أنه يشترط في زكاة مال التجارة أن يكون قد نوى عند شرائه أو تملكه أنه للتجارة، والنية المعتبرة هي ما كانت مقارنةً لدخوله في ملكه؛ لأن التجارة عمل فيحتاج إلى النية مع العمل، فلو ملكه للقنية ثم نواه للتجارة لم يصر لها، ولو ملك للتجارة ثم نواه للقنية وأن لايكون للتجارة صار للقنية، وخرج عن أن يكون محلاً للزكاة ولو عاد فنواه للتجارة لأن ترك التجارة، من قبيل التروك، والترك يكتفى فيه بالنية كالصوم. ( ٢٣ / ٢٧١)
اگر گاڑی تجارت ( یعنی بیچ کر نفع کمانے ) کی نیت سے نہیں خریدی تو اس پر زکات واجب نہیں ہوتی، چاہے گاڑیاں دو ہوں یا دو سے زیادہ ہوں۔
حاصل کلام یہ ہے کہ کرائے والے گاڑیوں کی ویلیو پر زکات لازم نہیں ہوگی، البتہ اس سے حاصل شدہ آمدن اگر جمع ہوتو زکات کا سال مکمل ہونے پر اس کی زکات لازم ہوگی، اور سال بھر میں جتنا کرایہ استعمال کرلیا اس پر کوئی زکات لازم نہیں ہوگی۔
واللہ ورسولہ اعلم بالصواب
كتبه/ محمد مجيب قادري لهان ١٨خادم دارالافتاء البركاتي علماء فاونديشن شرعي سوال و جواب ضلع سرها نيبال
0 تبصرے