کیا منگنی کرنا سنت ہے؟

 (259)

کیا منگنی کرنا سنت ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

السلام علیکم رحمۃ اللہ تعالیٰ وبرکاتہ

کیا فرماتے ہیں علمائے کرام و مفتیان شرع متین مسئلے کے بارے میں

۔ 1) کیا منگنی کرنا سنت ہے؟

۔2) جس کپڑے کو پہنے ہوئے ہوں اگر اس میں مذی لگ جائے تو کیا اسی میں نماز پڑھ سکتے ہیں ؟ یا پہنے ہوئے کپڑے کو پاک کرنا اور بدن کے اس حصہ کو دھونا ضروری ہوگا؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساںٔلہ:_نصرین فاطمہ رضویہ  مرزاپور ، یوپی انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمدہ ونصلی علی رسوله الکریم

وعلیکم السلام ورحمة الله وبرکاتہ 

الجواب بعونه تعالیٰ عزوجل

منگنی کرنا سنت نہیں ہے بلکہ منگنی نکاح کا وعدہ ہےیعنی لڑکے اورلڑکی کے والدین ایک دوسرے سےاپنے بچّوں کی شادی کا جو مُعاہَدہ کرتے ہیں مثلاً لڑکےکے والدین کہتے ہیں آج سے آپ کی بیٹی ہماری ہوئی یا لڑکی کے والدین کہتے ہیں آج سے آپ کا بیٹا ہمارا ہوا یا آپ کی لڑکی مجھے پسند ہے میرے بیٹے سے شادی کر دیں 

وغیرہ تو یہ جو وعدۂ نکاح یا بات پکّی کرنا ہے یہی درحقیقت منگنی ہے اوریوں کہنےمیں دین ِ اسلام  میں کوئی حَرَج نہیں۔

حکیمُ الاُمَّت حضرت مفتی احمد یار خان نعیمی رَحْمَۃُ اللّٰہ عَلَیْہ فرماتے ہیں :

منگنی دراصل نکاح کا وعدہ ہے اگر یہ نہ ہو جب بھی کوئی حرج نہیں(اسلامی زندگی ص ۳۹) 

۔۲) مذی ناپاک ہے اور نجاستِ غلیظہ ہے۔ کپڑے پر لگنے سے کپڑا ناپاک ہوجاتا ہے۔ اگر اس کی مقدار  ایک درہم سے کم ہو اور اس کو دھوئے بغیر نماز پڑھ لی جائے تو  نماز ہوجائے گی،اگر اس کی مقدار ایک درہم کے بقدر یا اس سے زیادہ ہو تو اسے دھونا واجب ہے۔ ایک درہم سے زیادہ ہونے کی صورت میں اسے دھوئے بغیر پڑھی گئی نماز نہیں ہوگی، جب کہ ایک درہم کے بقدر ہو تو اس کو دھوئے بغیر پڑھی گئی نماز کراہتِ تحریمی کے ساتھ ادا ہونے کی وجہ سے اسے اپنے وقت میں لوٹانا واجب ہوگا۔

بہار شریعت میں ہے

 نَجاستِ غلیظہ کا حکم یہ ہے کہ اگر کپڑے یا بدن میں ایک درہم سے زِیادہ لگ جائے ،تو اس کا پاک کرنا فرض ہے، بے پاک کیے نماز پڑھ لی تو ہو گی ہی نہیں اور قصداً پڑھی تو گناہ بھی ہوا اور اگر بہ نیتِ اِستِخفاف ہے تو کفر ہوا اور اگر درہم کے برابر ہے تو پاک کرنا واجب ہے کہ بے پاک کیے نماز پڑھی تو مکروہ ِتحریمی ہوئی یعنی ایسی نماز کا اِعادہ واجب ہے اور قصداً پڑھی تو گنہگار بھی ہوا اور اگر درہم سے کم ہے تو پاک کرنا سنّت ہے، کہ بے پاک کیے نماز ہوگئی مگر خلافِ سنّت ہوئی اور اس کا اِعادہ بہتر ہے

۔(بہار شریعت ح دوم ص ۳۹۲) 

والله و رسوله اعلم بالصواب

كتبته اسدیہ قادریہ بینی آباد مظفرپور بہار۔ گروپ خواتین کے مسائل کا شرعی حل

تصحیح و تصدیق حضرت مفتی محمد مجیب قادری حنفی العربی دار الافتاء البرکاتی علماء فاؤنڈیشن شرعی و جواب