یوم عرفہ کا روزہ رکھنے کی کیا فضیلت ہے؟

 (249)

یوم عرفہ کا روزہ رکھنے کی کیا فضیلت ہے؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

الســـلام علیکم ورحمۃ اللہ وبرکاتہ

کیا فرماتے ہیں علمائے دین و مفتیان شرع متین مسںٔلہ ذیل کے بارے میں

یوم عرفہ کے روزے رکھنے کی کیا فضیلت ہے ؟ 

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساںٔلہ:_شبنم پروین مہاراشٹر انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمدہ ونصلی علی رسوله الکریم

وعلیکم السلام ورحمة الله وبرکاتہ 

الجواب بعونه تعالیٰ عزوجل 

نو ذی الحجہ کو یوم عرفہ کہتے ہیں اس دن روزے رکھنے کی بہت فضیلت بیان کی گئی ہے لیکن حج کرنے والے پر جو عرفات میں ہے، اُسے عرفہ کے دن کا روزہ مکروہ ہے

حدیث شریف میں ہے

حضرت ابو قتادہ رضی اللہ عنہ سے روایت ہے کہ نبی صلی اللہ علیہ و سلم نے فرمایا

صِيَامُ يَوْمِ عَرَفَةَ أَحْتَسِبُ عَلَى اللَّهِ أَنْ يُكَفِّرَ السَّنَةَ الَّتِي قَبْلَهُ، وَالسَّنَةَ الَّتِي بَعْدَهُ 

ترجمہ:مجھے اللہ تعالی کی ذات سے امید ہے کہ وہ یوم عرفہ کے روزے رکھنے کی صورت میں گزشتہ سال اور اگلے سال کے گناہ بخش دے گا

۔(صحیح مسلم ،کتاب الصیام،باب استحباب صیام ثلاثۃ ایام۔۔۔الخ، جلد دوم ،ص ۸۱۸،حدیث ۱۱۶۲،دار إحياء التراث العربي،بيروت)

مسند ابو یعلیٰ میں ہے

 عَنْ سَهْلِ بْنِ سَعْدٍ، قَالَ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «مَنْ صَامَ يَوْمَ عَرَفَةَ غُفِرَ لَهُ سَنَتَيْنِ مُتَتَابِعَتَيْنِ» 

ترجمہ: حضرت سہل بن سعد رضی ﷲتعالیٰ عنہ سے روایت کیا ہے کہ رسول ﷲصلی ﷲعلیہ وسلم نے فرمایا : جس نے عرفہ کے دن روزہ رکھا اس کے مسلسل دوسالوں کے گناہ معاف ہوجاتے ہیں

۔ ( مسند ابو یعلیٰ، من مسند الزبير بن العوام ، جلد ۱۳ ، ص ۵۴۲،حدیث ۷۵۴۸ دار المأمون للتراث،دمشق)

سنن ابن ماجہ کی حدیث پاک ہے

عَنْ عِكْرِمَةَ، قَالَ دَخَلْتُ عَلَى أَبِي هُرَيْرَةَ فِي بَيْتِهِ، فَسَأَلْتُهُ عَنْ صَوْمِ يَوْمِ عَرَفَةَ، بِعَرَفَاتٍ فَقَالَ أَبُو هُرَيْرَةَ: «نَهَى رَسُولُ اللَّهِ صَلَّى اللهُ عَلَيْهِ وَسَلَّمَ عَنْ صَوْمِ يَوْمِ عَرَفَةَ بِعَرَفَاتٍ» 

ترجمہ:حضرت عکرمہ رضی اللہ تعالیٰ عنہ سے مروی ہے کہ میں حضرت ابوہریرہ رضی اللہ تعالیٰ عنہ کے پاس ان کے گھر میں حاضر ہوا تو عرفات میں عرفہ کا روزہ رکھنے کے حوالے سے تو پوچھاتو آپ نے فرمایا: رسول اللہ صلی اللہ علیہ وآلہ وسلم نے عرفات میں عرفہ کو روزہ رکھنے سے منع فرمایا ہے۔

۔(سنن ابن ماجه،كتاب الصيام،باب صيام يوم عرفة،جلد اول، ص ۵۵۱، حدیث ۱۷۳۲،دار إحياء الكتب العربية،الحلبي)

والله و رسوله اعلم بالصواب

كتبته اسدیہ قادریہ بینی آباد مظفرپور بہار۔ گروپ خواتین کے مسائل کا شرعی حل

تصحیح و تصدیق حضرت مفتی محمد مجیب قادری حنفی العربی دار الافتاء البرکاتی علماء فاؤنڈیشن شرعی و جواب