کیا صحابہ کرام رضی اللہ عنہم کو بھی علم غیب ہوتا ہے؟

(289)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

السّلام علیکم ورحمتہ اللّٰہ وبرکاتہ

کیا فرماتے ہیں علمائے دین اس مسئلہ کے جواب میں کہ اولیاء اللہ کو علم غیب ہوتا ہے کیا صحابہ کو بھی ہوتا ہے کسی نے کہا کے اولیاء اللہ کو اگر غیب کا علم ہوتا تو صحابہ کو بھی ہوتا کیوں کے صحابہ کا مرتبہ اولیاء اللہ سے بڑا ہے اگر اولیاء کو غیبداں کہا جائے تو اولیاء کا مرتبہ صحابہ سے کم ہوا قرآن و حدیث کی روشنی میں تسلّی بخش جواب عنایت فرمائیں تاکہ منکرین کو منہ توڑ جواب دیا جا سکے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ساںٔلہ:_معظمہ فاطمۃ بنارس انڈیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نحمده ونصلي علي رسوله الكريم

وعلیکم السلام ورحمة الله وبركاته

الجواب بعونه تعالي عز وجل

صحابہ کرام اور اولیا عظام دونوں کو بھی علمِ غیب عطائی ہوتا ہے، مگر بواسطہ انبیا کے۔یعنی انبیاء کرام علیہم الصلوۃ والسلام کے علاوہ صحابہ کرام اور اولیاء کرام علیہم الرحمۃ کو بھی اللہ پاک علم غیب عطا فرماتا ہے اور کئی ایسے واقعات کتب میں موجود ہیں ،جن میں صحابہ کرام علیہم الرحمۃ نے مختلف غیب کی خبریں ارشاد فرمائیں حضرت ابوبکرصدیق رضی اللہ تعالی عنہ نے اپنی حاملہ زوجہ کے بارے میں بتایاکہ میری وفات کے بعداس سے بیٹی پیداہوگی (موطاء امام مالک،کتاب الاقضیۃ،ص 645،مطبوعہ:کراچی)

حضرت جابررضی اللہ تعالی عنہ کے والد نے جہادمیں رات کوبتا دیا تھا کہ کل میں شہید ہو جاوں گا (صحیح بخاری کتاب الجنائز، ج01، ص 180 ، مطبوعہ کراچی)

حضرت عمرفاروق اعظم رضی اللہ تعالی عنہ نے مدینہ منورہ میں رہتے ہوئے مقام نہاوند پر موجود اسلامی لشکرکی پریشانی دیکھ کراس کی مدد فرمائی (مشکوۃ شریف ،کتاب الکرامات،ص546،مطبوعہ:کراچی)

اور مفسرین ومحدثین نے اولیاء کرام علیہم الرحمۃ کوملنے والے علم غیب کی وضاحت بھی فرمائی ہےچنانچہ تفسیر روح البیان میں ہے:

یطلع علیہ غیر الرسول إمّا بتوسط الأنبیاء۔۔۔أوبأن یلہم اللہ بعض الأولیاء وقوع بعض المغیبات في المستقبل بواسطۃ الملک، فلیس مراد اللہ بہذہ الآیۃ أن لا یطلع احداً علی شيء من المغیبات إلاّ الرسل لظہور أنّہ تعالی قد یطلع علی شيء من الغیب غیر الرسل). ترجمہ: رسول کے علاوہ بھی غیب پر مطلع ہوتے ہیں، انبیا کےو اسطے سے یا اللہ پاک بعض اولیاء کو مستقبل میں ہونے والے بعض غیبی واقعات پر فرشتے کے واسطے سے خبر دیتا ہے۔لہذا اس آیت کے ذریعے اللہ پاک کی یہ مراد نہیں ہے کہ رسولوں کے علاوہ کوئی غیب پر مطلع نہیں ہوتا کیونکہ یہ بات ظاہر ہے کہ کبھی اللہ پاک رسولوں کے علاوہ کو بھی غیب پر مطلع فرما دیتا ہے۔ (تفسیر روح البیان،جلد10 ، صفحہ 201، دار الفکر ، بیروت)

ارشاد الساری میں ہے

ولا یعلم متی تقوم الساعۃ أحد إلاّ اللہ إلاّ من ارتضی من رسول فإنّہ یطلعہ علی ما یشاء من غیبہ، والولي التابع لہ یأخذ عنہ

ترجمہ: اللہ پاک کے علاوہ کوئی نہیں جانتا کہ قیامت کب آئے گی ہاں اللہ کے پسندیدہ رسول کہ اللہ پاک اپنے غیب میں سے جس پر چاہے ان کو مطلع فرما دیتا ہے اور ولی نبی کے تابع ہے،وہ نبی سے(علم غیب ) لیتا ہے۔ (ارشاد الساری جلد 7 ،صفحہ 186، المطبعة الكبرى الأميرية، مصر) (ایسا ہی فتاوی اہل سنت میں ہے)

یاد رہے کہ صحابہ کرام رضی اللہ عنہم مقرب اولیاء اللہ ہیں غیر صحابہ ولی کا مقام و مرتبہ صحابہ کرام سے کم ہے کوئی بھی ولی، درجے میں صحابہ کرام کے مقام و مرتبہ کو نہیں پہنچ سکتا ۔

واللہ ورسولہ اعلم بالصواب

كتبه/ محمد مجيب قادري لهان ١٨خادم دارالافتاء البركاتي علماء فاونديشن شرعي سوال و جواب ضلع سرها نيبال